2011 in review

The WordPress.com stats helper monkeys prepared a 2011 annual report for this blog.

Here’s an excerpt:

A San Francisco cable car holds 60 people. This blog was viewed about 1,900 times in 2011. If it were a cable car, it would take about 32 trips to carry that many people.

Click here to see the complete report.

Posted in yatra sansmaran, yattharth, Zindagi | Tagged , , | Leave a comment

Bachpan ke Din bhulaaye nahi maine..

Issme bachpan ke sune gaye dheron kisse kahaaniyon ki udhed-bun hai. Saar-sankchhep me aap isse bahot kuchh kori kalpana aur bahot se logon ke Jeevan me se uuthaayi gayi kuchh chatpati baton ka sammiishran maan sakte hain. Ye meri kahaani na hokar, kuchh kuchh mere nanihaal ki, jo ho sakti thi, wo kahaani hai.. Mujhe bahut afsos hota hai ki mujhe maarwadi nahi ati. Apni naaniji se seekh nahi paayi main. Ma ko bhi nahi aati.. par phir bhi koshish ki hai maine, un lamhon ko waise hi achaari masaale me lapetne ki jo shayad tab ghatit huye honge, teekhe-chatpate se, aur meri ma ne sune honge chatkhaare le-lekar! Ye kuchh sansmaran, ek samay nanhi rahi Paankhuri ke muh se, jo ab badi hogayi hai.

Mujhe sabse spasht apni dadiSa ki baaten yaad hain. Unki daant-fatkaar, aankhen tarerna, unke niyam-kanoon, unki ummeeden sabse! Pitaji unke bade bete the, par sautele. Kintu unhone pitaji aur chachu me fark karna nahi seekha, shayad dada saheb ke dar se! Par unka karkash swabhaaw amma par haawi hone lagta!
Unhe bahut ummeeden theen chachu se, jo ki pitaji se kul 8 saal chhote the, jitni ki meri umar thi jabka ye kissa hai.
Ye ek purana vakya, meri zindagi ki diary ka, jiske panne, main ek ek kar ke, koi bhi, kaheen se bhi, khol rahi hoon..
Achaar ki barni (bote) me sarson ka tel daalte/bharte samay jeene ke paas parchhayeen dekh zor se chillayeen dadi sa.. “kathe ja ri se chhori?? Athe aa! Chal thaari akal main thikaane lagaaun se!” 
Dar ke maare praan sookh gaye! Dadi ne fir pakad lia the mujhe patang udaane jaate chupke-chupke!
Ab to khair nahi!

Isse pehle ki meri thukaayi hoti, bhaiyya ne aakar mujhe bacha lia. Chhote bhai sa ko bahiyya bolna hamaare yahaan ka vyavhaar hai. Unhone kaha, “dadiSa, jiji ye patang to mere vaaste lekar ja ri se!” Wo aur kuchh kahe, isse pehle dadi sa ne ghoor kar mujhe bula lia aur rasoi-ghar se doosra imratbaan uttha laane ko kaha. BhaiSa ko ishara mil chuka tha, patang ki tarah udd jaane ke liye, fir bhi wo khade rahe. Bole, “dadisa, meri tikli kaun pakdega?” Dadisa chillayeen, ” hurr chhore, pareshaan naaiy kar chhori ko, chal bhag yahaan se!” Mere sapno par ghadon pani pad gaya! Par shukra hai, dadisa ko ye nahi pata laga ki main patang udaane wali thi!

Mujhe patang udaane ka bada utsaah aur utsukta bhari lalsa thi! Parantu Pitaji uske viruddh the. Unka manana tha ki padhna likhna to theek par kaheen chhori ne haath-pair tuda liye to byaah hona bhi doobhar hojayega. Mere pitaji bahot khule vichaaron ke the aur kisi cheez ke liye mana nahi karte the, so ye baat maine unki maan li. Waise bhi humaare yahaan ghar ke badon ki baaten na maanane aur taalne ka kqaayda na tha.

Maine swayam ka dil rakhne ko duchhatti (attic) ki khidki mein parde ki jagah patange taang leen. Unke beech beech me paardarshi chamkeele neele kaaghaz ke baadal taank liye. Unn se chhan chhankar aati rang-birangi raushni mano mere khwaabon khayaalon ki sunheli dunia me hazaaron titliyaan uda dia karti thi; mere sapno ke samandar me saikdon machhliyaan taira dia karti thi! Rang birangi raunshniyon wale jugnu chamka karte thay..!
Main khushi ke maare jhoom utthti thi gar sachmuch me koi raah bhatki huyi titli mere sapne ki tokriyaan bunane wale iss baithak-numa, behad neechi chhat waale iss kamre me chali aati thi. Ek baar maine ek masoom, naazum si, mere napaak iraadon se anjaan titli ko uske pankhon se pakad lia. Usse ek kaanch ki botal me band karke kas kar dhakkan laga dia ki kaheen haath se na nikal jaaye! Aur intezaar karne lagi agle din ka jab main school jaakar apani saheliyon ko apni bahumulya daboch dikhati!

Agle din ki subaah, jab main taiyaar hone ke baad daudti daudti, seedhiyaan ulaanghti khushi se haanfti, upar tak pahunchi, to dekha, uske praan pakhru udd chuke the! Wo pankh fadfada fadfada kar apne praan tyaag chuki thi. Meri baal-buddhi ko behad tthes pahunchhi aur bal-man ko gehra dhakka laga. Jaane kya hua, main bahut tez bukhaar me pad gayi us kisse ke baad. Ek hafta bukhaar na utra. Utra to titli-jugnu pakadne ka khumaar bhi saath utra. Ab mujhe jaane kyun ye vishwaas baith gaya tha ki titli ya jugnu ko quaid karna ashubh hota hai, ap-shagun lata hai. Aaj padhi-likhi hoon so paryaavaran ke lihaaz se to ye baat aur bhi saarthak lagti hai, par jo bhi hai, kaheen achcha hi hua ki mujhe wo titli-jugnu pakadne ki tamanna chhoot gayi !

Ma bataati theen ki Pitaji ne dada saheb se vichaaron me khulapan virasat me paya tha. So unhone kabhi bhi mere school jane par rok nahi lagayi. Dadisa ke laakh virodh ke bawajood. Na hi mujh me aur bhaiyya me koi fark kiya, siwa patang udane ke. Wo bhi isliye ki Unhe mera natkaht-pana, khilandad-pana maloom tha. Unhe pata tha ki alhadpane me main chot-chappat kha gayi to byaah me khoob dikkat ayengi, so ye soch kar wo mujhe hadd se adhik uchhal-kood karne par rok-tok karte, isse zyada kuchh nahi. Wo kehte the, ladkiyon ko aajkal ghar ke kaaj ke alwa padhna-likna bhi ana hi chahiye.
Jab chachu ki Japan se chitthi aati to wo mujhse thitholi me puchhte “Tane Kuchh padhna likhna aawe koni?” Aur main khilkhilati kilkaari maarti chitthi lekar baith jaati sabke liye baanchne ko.
Amaa baithi baithi muskuraati rehteen, kaam karte huye aur dadisa aankh me paani bharti rehteen.

Chachu Japan gaye huye the. Padhayi poori karne Engineering ki. Main chachu se bahot hili-mili huyi thi. So unki rang-birange postcardon par jab khaas mere liye patra aate to main maare khushi ke jhoom utthti. Fir kuchh aur apne utsukta bhare totle sawaal likh bhejti ! Mera bhaiyaa bhi baitha mujhe gilehri ki tarah tukur tukur takta, jab main badi tanmayta se, zor zor se bol bol kar, ek ek shabd jama jama kar likhti unko. Aur likhti ki mere liye Japani gudiya aur Bhaiyaa ke liye daudne wali motor-gadi laal rang ki zaroor lana! fir hum dono daudne ki pratiyogita karte huye, dakghar tak jaate aur kaka se keh lkar post karwaate. Sabko Chahchu ka pata maloom tha daakghar me, ek unhi ki to chhitthi aati thi Japan se. yun to bahot se prawaasi base the videsh me hamaare gaon se, parantu japan me koi nahi.

Japani gudiya ki aas lagaaye lagaaye 2 saal beet gaye aur jab Chachu aaye to sachmuch ki japani gudiya le aaye! Saanwale, muchhad, gitte par raubile mere chachu aur mome ki gulabi gudiya, chhoti chhoti ankon wali meri chhutki si chachi. Jaise ki sab bole, “batuye si haigi ya to!” Amaa ko bada dhakka pahuncha tha apni chhoti bahu ke sapno ko lekar. Par na to pitaji ne kuchh kaha na Dadisa ne Aur amama ne to khoob hans kar swagat kia, aao-bhagat ki. Ptaji ne hi amma ko samjhaya aur khule man se iss itne bade balaav ko jeewan me sweekar kia. Chachu jald hi wapas laut gaye apni videsh me lee huyi naukri par ur amma ki karkasha awaaz kheej me tabdeel hogayi. par ek bhala huya iss sab me, Amma ki muskurahaton, samarpan aur sehansheelta (bardaasht) ne ab dadisa ko unhe khule man se asli bahu manane aur sweekaarne pe majboor kar dia.

Aksar chalchitra, ya pustikaaon ke chitron me achaar-murabbon ki barniyon aur imratbaano ko dekhkar, ya fir sookhte failte papad-badiyon, sanrakshit kiye jaane wale phal-sabziyon ke rang-birange sookhte dheron ko dekh kar ye ehsaas karaya jata hai ki kitna mazedaar kaam hota hoga ki sara parivar lag kar badi tanmaiyta se ye sab bana raha hai aur anand uttha raha hai. Satya iske veeparet tha! Amaa, Anni bua se lekar maharajin taayi aur baamni, sabhi mandhe rehte the inn kaamon me! Upar se main dikh jaaun to mere bach nikalne ki bari kam hi lagti thi! Sara samay mirchon ke chhat par sookte rehne ke kaaran chheenke lagne ka dar so alag! fir kaheen parchhayeen na pad jaay kisi ki inn sab cheezon par jo itti menhat kar ke banaaye hain! Bekaar maan kar phenkani padti theen tab to. Anni bua ke byaah (vivah) ke baad ye sab kam na hua. Ab unke yahan jaane ko tarah tarah ke paad bilte-sookhte rehte the. Daal motth, daal biji, moong-dal ki namkeen aur bhujia, aur bhi bahot kuchh har samai rasoi me banta rehta! Mujhe toh Chhailoo halwaayi ke yahan ke pede aur jalebiyaan, zyada achche lagte the iss sab se!

Main chhat par chupke se jaakar hing ka achchar chura chura kar khaati rehti! Wo mera sabse pasandeda achaar tha. Aam ke saare achaar meri khaas pasand the! Ek baar, garmiyon ke din the. Anni bua ka byaah nahi huyi tha. Unn dino wo mujhe silaayi ke anke sikha rahi theen. kaafi silaayi seekh ke aane ke baad, mujhko bhook lagi. Tab fridge itne aam aur lokpriya na the. Hamare yahaan , niyam se, bche huye aate ki rotiyaaan bna di jateen ki daan-ityaadi ke kaam me ajayen ya ir isilye ki bachchon ko bhook lag jaaye. Anni bua apni aheli santo ke ghar chali gayen theen aur mine amma ke kamre me jhanka to wo dadisa ko pankha jhalte jhalte sogayi theen. Maine dabe paon haweli ke dalaan aur beech ka aangan ko paar karte huye rasoi-ghar ki ore kadam badha diye. Maqsad tha roti ke saath me achchar ki jugat lagana.
Kismat lagta hai mere saath thi kyunki muje paas hi me ek chowki dikh gayi. Maine fataafat chowki jamaayi rasoi-ghar ki alagni me rakhe aam-chutney ke bote ko utaarne ke liye. Uska bote zara peeche ko tha. Jyun hi aagey wala bote hath me aya, mera santulan bigad gaya aur main girne lagi. Bhaiyaa chupke se ye sab dekh raha tha. usner daud kar mujhe to girne se bacha lia, apr bote haath se chhhoot gaya aur kaanch choor-choor ho saare farsh par bikhar gaya. Dadi ki, amma ki, misrayn ki, sabki neend khul gayi ur sab billi, chooha, bandar ghus aya samjh kar andar daudte chale aaye. Main to buri tarh phans gayi thi aur aankhon me paani utar aya tha. Par bhaiyaa zor zor se rone lag gaya aur sab unke rone se bargala (baura) gaye. Poochchne par unhone kaha ki bhook lagi hi, unka man meethi chutney khaane ko tha, bote haath me doosra agaya aur fisal kar foot gaya! Wo to jiji (main) agayi nahi to jaane kaise sir footata bote ki jagah! Main hakki-bakki uska naatak dekh rahi thi aur man hi man uss par dheron pyar umad ha tha! Misraayan ji boleen, ” Toh bitua, bitiya se (mujhse) keh kar utarwa lete bote! Thaare chot na lagi ye sukar karo ab!” Mujhe roolaayi me bhi hansi chhootne ko hogayi! Bitiya ko haath kaunsa lagaane dete hain ki bhaiyaa usse utarwa lete! Par badon ko ye sab kaun samjhaaye!

Yunhi hanste-khelte, sharaaraten karte waqt bhaagta gaya aagey aagey, aur main uske peechhe, mano fir koi patang ki dor haath se chhuti ja rahi ho!
Posted in Bachpan, Kahani, Zindagi | Tagged , , , , , , , , , , , , , , | Leave a comment

Hasratein aur Chaahtein ~

Har cheez kho nahi sakte, to har cheez pa bhi nahi sakte.. Maante hain, ki haarna theek adat nahi, par Jo tumhara tha hi nahi, use jaane dene ki kuuwat rakho! Jis pe dil agya, usse haasil hi hai karna, aise soch me zara us ‘cheez’ ke dil ki tamanna bhi to puchho? Aur kosne se pehle, jaan to lo, kya kisi ka hai, tha, raha, gaya, kisine pehle hee kitna khoya, aur kya darasal kiska hai, kitna hai, kis gehraayi tak hai, kis tarah juda hai, alhaida reh kar bhi juda hai aur koi jud ke bhi alhaida hai, ye jaananae ke liye, samjhne ke liye, apne andar thehraav rakho, waqt ko waqt do..! bas, jo dekh lia, man bha gaya, wo har shakhs tumhara nahi ho sakta! Jo gar kisi aur ka hai, to us ko paane ki hasrat rakhna, uski ichtchha ke khilaaf, jisko tum pana chahte ho, aur wo hasrat me bad-dua rakhna, buri neeyat kehlaati hai. Bad-dua lagegi to usi ko, jis ko itni shiddat se chaahte ho? Gar har chaahane waale ne aise hi bad-dua di, to uska kya hashra hoga, jisko ye chaahat bad-dua samet haasil ho? chaknachoor ho ke kya bachega usmein? kya haasil hoga tumko?? To jisko chaahte ho, usse sachche dil se chhaho, uske liye dua karo, gar bad-dua me usse shaamil kia, jise wo chaahta hai, to fir tumne darsal ye kahaa, ki jisko chahta hoon, usi ko ye bad-dua haasil ho ! Pyar wahi sachcha, jiski khushi me tumhaari khushi shaamil ho. Chaahte ho jo darsal kisko, to usse sukhi hone ki itni dua do, ki rooh se jo nikle uske thandak, wo tumhari agan bhi sheetal kar saken. Chandan ka lep na sahi, chaand ki sheetalta me bhi bahot tripti hai.

*P.S. ~ Wrote this as a mental response to something I read yesterday and disturbed me no bounds. I felt compelled to write this.. and as my mind dictated.. and my fingers couldn’t type that fast, I have missed out on a few gross points, but will add asap.

Posted in Dard, Jeevan Saar, Pyar, Swapn, Ummeed, Vichaar, yattharth, Zindagi | Tagged , , , , , , , , , | Leave a comment

Naam ki aapke ek hansi.. padh ke muskuraeeyega, na kaheeyega nahi :)

Koi jab humse humaare gumzada hone par khafa hota hai

to ye soche ki hum par tab kya guzarti hai jab wo rota hai?

Aisa nahi ki hume nahi samjh

zindagi ki khushiyon ki,

na hi humse juda* hain baatein

jo unhone abhi kaheen theen

muft mein kosne ki kismat ko apni,

aadat lagti hai gar kisi ko humaari

dukh ye hai ki nahi dekhte wo koshish

un mushkilon mein humaare hansne ki..

Par khushi hai ki humein, ki zindagi me

khushi pana wo hume sikhana chaahte hain

Hum sir jhuka ke baa-adab chalte hain saath

kyunki hum unke saath muskurana chahte hain..!

~ Gustaakhi maaf, kripya padh kar muskuraayen,

ye na sochein hum dheeth hain, aur kuchh aur dukhi hojayen :| :/ :\ :(

*alag, alhaida, seperated, disconnected, not understood

 

Ye Un sabhi doston ke naam jo mujhe humesha muskuraate huye dekhna chahte hain. Aur ye bahot sincerely likhi hai maine, yunhi koi tukbandi nahi hai, aur na hi kisi ko ye kehne ki koshish hai ki wo mujhe samjhaate kyun hain, ya raah dikhate kyun hain. Dost hain, to raahen hain, mushkilein hain, to muskuraahtein hain.. maloom hai humey, isiliye to sab gumon ke rehtey hum aapse juda (different) nahi, judey (connected) huye hain !

Posted in Jeevan Saar, Nazm, Pyar, Ummeed, Zindagi | Tagged , , , , , , , , , | 2s टिप्पणियाँ

Zindagi .. Ek Diary

Jab diary ho jaye zindagi..
to waqt ke saath..
zild nahi.. zillat fat jaati hai..
kuchh panno se muhabbat..
kuchh lamhon se nafrat hat jaati hai..
Yun to wahi baaten hain kuchh doharaayi huyi..
isliye daastaan kuchh rutt si jaati hai..
Waise Ab bhi likh rahi hoon roz doston..
dekhen ye kambakht kab tak saath nibahaati hai .. !!

 

 

If I fall asleep with a pen in my hand, don’t remove it – I might be writing in my dreams.
~Terri Guillemets
Posted in Dard, Jeevan Saar, Kahani, Nazm, Zindagi | Tagged , , , , , , | 1 टिप्पणी

Ek Aakhri Khat Tumhaare Naam

179654_131409640258883_110880618978452_225626_2817624_n

 

 

 

 

 

 

 

 

 

 

Aaj, bahut se jo khat likhe the

tumhare naam

Jala diye maine ~puchho kyon?

Tumhe itne shikwe the humse
ye hume pata na tha

Tumhaare gum ke aagey
hamaare gile kuchh bhi nahi

Aaj,
bahut se Aansu
jo bachaa rakhe the tumhaare liye

bahaa diye maine
~wo isliye

ki Tumhaari wafa itni gehri thi
ki hum Shikaayat
karte bewafaa se lage

Aaj, jo bhi faasle the
hamaare dilon ke darmiyaan
Wo mita diye maine ~aisa yun

ki ilzaam lagaane me rakha kya hai
Aur dard chhupaakar
apne humsafar se,
dooriyaan badhaane me rakha kya hai

Tumhaare liye jo maafi chhupa rakhi thi
Wo aaj bhula di maine
~kyunki

Galtiyaan itni ki maine,
ki aapki nazron me hum
Pyaar ki jagah gunehgaar ho gaye

Jaante hain ki
maaf karna nahi hai aapki fitrat

Phir bhi maaf kia mujhe,
ye jaan kar hum sharmsaar ho gaye

Bas ik ehsaan aur kar do mujh par
ki yon mazaak me bhi na kahaa karo khud ko Bewafaa..

Khel-Khel me tumhaare,
ik din meri jaan chali jayegi..!

~Ek Purani nazm meri

Posted in Dard, Nazm, Pyar, Zindagi | 29s टिप्पणियाँ

December Ki Baarish

ठण्ड के मारे हाड़ क्या दरवाज़े भी कंपकंपा रहे थे | ये सीली गीली ठंडी शरद ऋतू की वर्षा अच्छी नहीं ना लग रही मुझे | पढ़ा है की फसल के लिए ज़रूरी होती है | चलो, किसी के लिए तो अच्चा है !
इस जुलाई की बरसात के बाद तुम्हारे लिए कवितायें लिखना बंद कर दिया है मैंने |
कितना बरसों उन् आसुओं को जो सीले दर्द की तरह हरदम टीसते रहते हैं ? तुमसे कितनी मिन्नतें की थीं रुक जाने की.. | कहाँ रुके तुम बरसाती नालों की तरह? बह गए अपनी मर्ज़ी की दिशा में |
ऐसी बाढ़ लाये तुम की फिर सूखा छोड़ गए !

रंग बदल देती बारिश बहुत सी चीज़ों के | सफ़ेद पुते हुए मकान नीले दिखने लगते हैं | पीली धरती हरी होने लगती है या सफ़ेद पहाड़ नीले |
मद्धम मद्धम सी बारिश में भी ज़िन्दगी आगे बढ़ ही रही है | ठहरी कहाँ है , कोहरे व बूंदा-बंदी में भी मेहतरानी झाड़ू बुहारी कर रही है, सड़क किनारे पड़ी बूढी अम्मा फेंकी हुयी लकड़ियों में आग सुलगा रही है और चाय की दुकानों में भाप और धुंआ मिलाजुला सा धुंधलका कर रहे हैं | मैं राम-पाठ कर रही हूँ | कर भी रही हूँ और नहीं भी | तुम जो हर दम हर चीज़ में सूझते रहते हो तो सब छोड़ तुम्हे ही सुमिरन करती रह जाती हूँ !

बारिश रुक गयी है | हलकी धूप निकल आई है | इधर सेल-फ़ोन बज रहा है.. “इक-ओंकार” की धुन लगायी है.. मन को शांत रखती है.. वैसे.. `ओ’पालनहारे’ भी तो तबसे अच्छा लगता है जबसे श्रीकृष्ण ही बचे मेरे सहारे.. बारिश अभी भी हो रही है.. पर मेरी विचार तन्द्रा भंग हो चुकी है.. चाय पी रही हूँ, आग सेंकते हुए.. और मुस्कुराते हुए सोच रही हूँ.. धरती की तरह, मेरे जीवन में भी नयी कोपल फूटेंगी.. बीज अंकुरित होंगे आशा के.. आखिर, शरद ऋतु के बाद ही तो झूमता वसंत आता है | :)


Posted in Dard, Kahani, Pyar, Zindagi | Tagged , , , , , , , , , , , , , , , , | 1 टिप्पणी

Kya Kahuun??

Paani ke bataase si
chatpati tumhaari baaten
Chup ho gayi hain
Misri ki dali si
Tumhaari khilkhilaahten
Ruk si gayi hain
Paan ke chuune si teekhi
Tumhaari Daanten
Ab thak gayi hain 

Jab se Tumhaari
Mujh se mulaquaaten
Band ho gayi hain.

Maaloom tha mujhe
Aise hi Thhak jaaogi
Mere jaane ka maun Sog
Manaaogi

Par Yakeen tha
tumhe mana sakunga
Kasam dekar Wada lelunga
Ki Yunhi rahogi tum Bolti Gaati
Jaise ab tak rahi ho gungunaati

Bakar-bakar Chatar-Patar
Aati rahegi
Tumhaare Honthon se
Sabke kaano tak

Par maloom pada
Tumhi ne bataya
Main hi tumhaari Aawaaz banke
Kavita me baaton me bolon me
Fuut tha pada

Manaa nahi paya main tumhe
Ab Jaa raha hoon
tumhaare geet
Tumhaari Zubaan leke
Tumhe firse gunga karke

Rahogi Baithi
Sajaa paaye Shila Jaisi
Gumsum Chupchaap Muh sile huye
Shoonya me Taakte…
Boojhte jaante huye bhi khokar mujhe
jaane Deke……….
Phirse taaron me khojte
Apne maun me bhi Chandrma se batiyaate

Aur ye kehte bataate………
..ki Tum theek ho
Bas chup ho gayi ho
bolte kehte Ab thak gayi ho.

Aur Main………..?
Sochta hoon ye…………..
Kaash! ya toh main na jaata
Ya Phir tumhaari zindagi me hi na aata.
Aur kehta hoon apne Chaand se~
Tumhe Dukh diya hai itna
Sazaa Do naa mujhe!!

Posted in Dard, Kahani, Kavita, Nazm, Pyar, yatra sansmaran, Zindagi | Tagged , , , , , , , , , | 1 टिप्पणी

Wo.. yani ki Tum

Kabhi ikraar karte hain
kabhi inkaar karte hain
bae-izatti kar ke darkinaar karte hain
aur yun ye daawe hain
ki wo humse pyaar karte hain.

#

Tum muskuraate rahe, hanste rahe mujh par
jab main girkar tadap rahi thi zameen par
mere kehne par to hansi nahi odhi tumne
gira dia mujhey khud ke gumon ka sahaara dekar !

#

muskurane se mana kar dia tumne
apne udas dil ka wasta dekar
mujhey tha kya pata is baat ka
jalte-sulagte ho tum meri khushi se
isliye jala diya karke mera chaak jigar

Posted in Dard, Nazm, Zindagi | Tagged , , , , , , , | 2s टिप्पणियाँ

Unn-madi khwaab

Bunane ko khwaab,
uun tumhi ne di thi
firte the wo kambal odhe
fir ukta gaye us niwaach se
chubhne lage wo sapne sunehre
narm mulaayam bandhan tode
jaise shaakh ne patte chhode
nahi samet ke rakha tumne
garm baahon me
dhakel ke sard december
ki raahon me
kuhaase me ghutne ko chhod dia
sannaate sa chupchap
mera thithura dil tod dia !

Posted in Dard, Nazm, Pyar, Swapn, Zindagi | Tagged , , , , , , , | 1 टिप्पणी